ಟಿ 20 ವಿಶ್ವಕಪ್ ಗೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಯುವ ಬೌಲರ್ ಹರ್ಷಲ್ ಪಟೇಲ್ ಸೇರಿದಂತೆ 8 ಬೌಲರ್‌ಗಳು ಭಾರತ ತಂಡಕ್ಕೆ ನೆಟ್ ಬೌಲರ್‌ಗಳಾಗಿ ಸೇರಿಕೊಂಡಿದ್ದಾರೆ.
2021 ರ ಟಿ 20 ವಿಶ್ವಕಪ್‌ಗಾಗಿ, ಟೀಂ ಇಂಡಿಯಾ ಕೊನೆಯ ಕ್ಷಣದಲ್ಲಿ ತಮ್ಮ ತಂಡದಲ್ಲಿ ದೊಡ್ಡ ಬದಲಾವಣೆ ಮಾಡಿದೆ. ಭಾರತೀಯ ಆಯ್ಕೆಗಾರರು ಆಕ್ಸರ್ ಪಟೇಲರನ್ನು ಮುಖ್ಯ ತಂಡದಿಂದ ತೆಗೆದುಹಾಕಿ, ಅವರನ್ನು ಸ್ಟ್ಯಾಂಡ್‌ಬೈ ಆಟಗಾರರಲ್ಲಿ ಸೇರಿಸಿಕೊಂಡಿದ್ದಾರೆ. ಶಾರ್ದುಲ್ ಠಾಕೂರ್ ಅವರ ಸ್ಥಾನದಲ್ಲಿ ಅವಕಾಶ ಪಡೆದುಕೊಂಡಿದ್ದಾರೆ. ಶಾರ್ದೂಲ್ ಠಾಕೂರ್ ಐಪಿಎಲ್ 2021 ರಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಆಟಗಾರ ಮತ್ತು ಕೆಳ ಕ್ರಮಾಂಕದಲ್ಲಿ ಉತ್ತಮವಾಗಿ ಬ್ಯಾಟ್ ಮಾಡಬಲ್ಲರು. ಈ ಕಾರಣದಿಂದಾಗಿ ಅವರಿಗೆ ಟೀಮ್ ಇಂಡಿಯಾದಲ್ಲಿ ಅವಕಾಶ ಸಿಕ್ಕಿದೆ.
ಟಿ 20 ವಿಶ್ವಕಪ್ ಸಮಯದಲ್ಲಿ ಹರ್ಷಲ್ ಪಟೇಲ್ ಕೂಡ ಭಾರತ ತಂಡದ ಜೊತೆಗಿದ್ದಾರೆ. ಈ ಬಲಗೈ ವೇಗದ ಬೌಲರ್ ಐಪಿಎಲ್ 2021 ರಲ್ಲಿ ಗರಿಷ್ಠ 32 ವಿಕೆಟ್ ಪಡೆದಿದ್ದಾರೆ. ಹರ್ಷಲ್ ಪಟೇಲ್ ಅವರ ನಿಧಾನಗತಿಯ ಚೆಂಡುಗಳು ಭಾರತೀಯ ಬ್ಯಾಟ್ಸ್‌ಮನ್‌ಗಳ ಸಿದ್ಧತೆಯನ್ನು ಮತ್ತಷ್ಟು ಬಲಪಡಿಸುತ್ತದೆ. ದೆಹಲಿ ಕ್ಯಾಪಿಟಲ್ಸ್ ವೇಗದ ಬೌಲರ್, ಐಪಿಎಲ್ 2021 ರಲ್ಲಿ 23 ವಿಕೆಟ್ ಪಡೆದ ಅವೇಶ್ ಖಾನ್ ಕೂಡ ನೆಟ್ ಬೌಲರ್ ಆಗಿ ಟೀಂ ಇಂಡಿಯಾವನ್ನು ಸೇರಿಕೊಳ್ಳಲಿದ್ದಾರೆ.
ಚೆನ್ನೈ ಸೂಪರ್ ಕಿಂಗ್ಸ್ ಸ್ಪಿನ್ನರ್ ಕರ್ನ್ ಶರ್ಮಾ, ಕೃಷ್ಣಪ್ಪ ಗೌತಮ್ ಅವರನ್ನು ಟೀಮ್ ಇಂಡಿಯಾದೊಂದಿಗೆ ನೆಟ್ ಬೌಲರ್ ಗಳಾಗಿ ಸೇರಿಸಲಾಗಿದೆ. ಈ ಇಬ್ಬರೂ ಆಟಗಾರರು ಐಪಿಎಲ್‌ನ ಯುಎಇ ಲೀಗ್‌ನಲ್ಲಿ ಆಡುತ್ತಿರುವುದು ಕಂಡುಬಂದಿಲ್ಲ. ಆದರೆ ಟಿ 20 ಸ್ಪೆಷಲಿಸ್ಟ್‌ಗಳೆಂದು ಪರಿಗಣಿಸಲಾಗಿರುವ ಕರ್ನ್ ಮತ್ತು ಕೃಷ್ಣಪ್ಪ ಅವರು ಭಾರತೀಯ ತಂಡದ ತಯಾರಿಗೆ ಗಮನಾರ್ಹ ಕೊಡುಗೆ ನೀಡಬಹುದು.
ರಾಯಲ್ ಚಾಲೆಂಜರ್ಸ್ ಬೆಂಗಳೂರಿನ ಎಡಗೈ ಸ್ಪಿನ್ನರ್ ಶಹಬಾಜ್ ಅಹ್ಮದ್ ಮತ್ತು ಸನ್ ರೈಸರ್ಸ್ ಹೈದರಾಬಾದ್ ವೇಗದ ಬೌಲರ್ ಉಮ್ರಾನ್ ಮಲಿಕ್ ಕೂಡ ನೆಟ್ ಬೌಲರ್ ಆಗಿ ಟೀಂ ಇಂಡಿಯಾಕ್ಕೆ ಸೇರ್ಪಡೆಯಾಗಿದ್ದಾರೆ. ಶಹಬಾಜ್ ಈ ಋತುವಿನಲ್ಲಿ 11 ಪಂದ್ಯಗಳಲ್ಲಿ 7 ವಿಕೆಟ್ ಪಡೆದಿದ್ದಾರೆ
ಉಮ್ರಾನ್ ಮಲಿಕ್ ಕೇವಲ 3 ಪಂದ್ಯಗಳಲ್ಲಿ ಆಡುವ ಅವಕಾಶವನ್ನು ಪಡೆದು, ಇದರಲ್ಲಿ 2 ವಿಕೆಟ್ ಪಡೆದದ್ದು ಮಾತ್ರವಲ್ಲದೇ 154 ಕಿ.ಮೀ. ವೇಗದಲ್ಲಿ ಚೆಂಡನ್ನು ಎಸೆಯುವ ಕಾರಣ ವಿರಾಟ್ ಕೊಹ್ಲಿ ಕೂಡ ಈ ವೇಗದ ಬೌಲರ್‌ನ ವೇಗದ ಅಭಿಮಾನಿಯಾಗಿದ್ದಾರೆ.
ಕೋಲ್ಕತಾ ನೈಟ್ ರೈಡರ್ಸ್ ಆಲ್ ರೌಂಡರ್ ವೆಂಕಟೇಶ್ ಅಯ್ಯರ್ ಕೂಡ ಟೀಂ ಇಂಡಿಯಾದೊಂದಿಗೆ ಸೇರಲಿದ್ದಾರೆ. ಐಪಿಎಲ್ 2021 ರಲ್ಲಿ ವೆಂಕಟೇಶ್ ಅಯ್ಯರ್ ತಮ್ಮ ಬ್ಯಾಟ್ ಮೂಲಕ ಜನರ ಹೃದಯ ಗೆದ್ದರು, ಆದರೆ ಅವರ ಬೌಲಿಂಗ್ ಕೂಡ ತೀಕ್ಷ್ಣವಾಗಿದೆ. ಇದಲ್ಲದೇ, ಟಿ 20 ವಿಶ್ವಕಪ್‌ನಲ್ಲಿ ಆಲ್‌ರೌಂಡರ್ ಗಾಯಗೊಂಡರೆ, ಈ ಆಟಗಾರನು ತನ್ನ ಸ್ಥಾನವನ್ನು ಸಹ ಪಡೆಯಬಹುದು
